ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ ᓇᐅᑦᑎᐅᒪᔪᑦ ᐆᒻᒪᖁᑎᓄᑦ ᐊᑭᖏᑦ
ᑐᒃᓯᕋᐅᑎᒧᑦ
ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ ᑐᓂᓯᓯᒪᓕᖅᑐᑦ ᑐᒃᓯᕋᐅᑎᒥᒃ ᑐᒃᓯᕋᖅᑐᖅ ᐊᖏᖅᑕᐅᖁᔨᓪᓗᑎᒃ
ᓴᖅᑭᑎᑦᑎᓂᕐᒥᒃ ᓄᑖᒥᒃ ᓇᐅᑦᑎᐅᒪᔪᑦ ᐆᒻᒪᖁᑎᓄᑦ ᐊᑭᖓ. ᑐᒃᓯᕋᐅᑎ ᓇᒃᓯᐅᔾᔭᐅᓚᐅᖅᑐᖅ ᒥᓂᔅᑕ ᑲᒪᔪᖅ
ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖᓂ ᕿᒥᕐᕈᔭᐅᓂᐊᖅᖢᓂᓗ ᐅᖃᐅᓯᐅᓗᓂᓗ ᓄᓇᕗᒻᒥ ᐆᒻᒪᖁᑎᓄᑦ
ᐅᑭᓕᖅᑕᐅᕙᒃᑐᓄᑦ ᕿᒥᕐᕈᔩᑦ ᑲᑎᒪᔨᖏᓐᓄᑦ (URRC).
ᐊᑭᒋᖁᔭᐅᔪᖅ ᐊᑭᓕᒐᒃᓴᖅᑖᖅᑎᑕᐅᑐᐃᓐᓇᕐᓗᑎᒃ ᓂᐅᕕᖅᐸᒃᑐᓄᑦ ᐃᓚᐅᔪᒪᙱᑦᑐᑦ ᓇᖕᒥᓂᖅ
ᐆᒻᒪᖁᑎᓕᐅᕐᓂᕐᒥᒃ ᑭᓯᐊᓂ ᑕᑎᖃᖅᖢᓂ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖᓂ ᓇᐅᑦᑎᐅᒪᓗᑎᒃ
ᑭᖑᕝᕕᖅᑎᒃᓴᒥᑦ ᐆᒻᒪᖁᑎᒥᑦ ᐃᒻᒥᓂ ᐆᒻᒪᖁᑎᖏᑦ ᐊᔪᓕᕌᖓᒥ.
ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ ᑲᔪᓯᑎᑦᑏᓐᓇᕆᐊᖃᖅᐳᑦ ᐆᒻᒪᖁᑎᖃᖅᑎᑦᑎᓂᕐᒥᑦ ᑐᓂᐅᖅᑲᐃᓂᕐᒥᓗ
ᐱᓕᕆᔾᔪᑎᓄᑦ ᐊᑐᖅᐸᒃᑕᒥᓂ ᐊᖑᒻᒪᑎᓗᓂ ᓄᓇᓕᖓ ᐊᑐᓗᐊᓕᕌᖓᑕ ᐆᒻᒪᖅᑯᑎᒥᒃ ᐱᔭᕆᐊᖃᒻᒪᕆᒃᑐᓂ,
ᐱᖃᓯᐅᑎᓗᒋᑦ ᑖᒃᑯᐊ ᓂᐅᕕᖅᐸᒃᑐᑦ ᓇᐅᑦᑎᐅᒪᕙᒃᑐᑦ. ᑐᒃᓯᕋᖅᑕᐅᔪᖅ ᐊᑭᖓ ᐱᔾᔪᑕᐅᔪᖅ ᐅᑎᖅᑎᑦᑎᓗᓂ
ᐊᑭᓕᒫᖓᓂ ᐊᑐᐃᓐᓇᐅᑎᑦᑎᓗᓂ ᐱᔨᑦᑎᕋᐅᑎᒥᒃ, ᓇᓗᓇᐃᖅᓯᕗᖅ ᓂᐅᕕᖅᐸᒃᑐᑦ ᐱᔭᕆᐊᖃᙱᓪᓗᑎᒃ
ᐃᑲᔫᑎᓂᒃ.
"ᓯᕗᓪᓕᐅᑎᔪᒪᔭᕗᑦ ᓇᓗᙱᑦᑎᐊᕈᒪᒐᑦᑎᒍᑦ ᐊᑐᖅᑕᐅᑦᑎᐊᕈᓐᓇᖅᑐᑦ ᖁᐊᖅᓵᕐᓇᙱᑦᑐᓪᓗ
ᐆᒻᒪᖅᑯᑎᖃᖅᑎᑦᑎᔾᔪᓯᑦ ᓄᓇᕗᒻᒧᑦ," ᑕᐃᒪᓐᓇ ᐆᓇᔅᑦ ᑕᒡᓚᔅ ᐅᖃᖑᓚᐅᖅᐳᖅ, ᐊᖓᔪᖅᑳᖅ
ᐊᐅᓚᑦᑎᔨᓪᓗᐊᑕᕐᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. “ᓴᖅᑭᑦᑎᓗᑎᒃ ᑖᔅᓱᒥᖓ ᓄᑖᒥᒃ
ᓇᐅᑦᑎᐅᒪᓂᕐᒧᑦ ᐊᑭᖏᑦ ᐱᔪᓐᓇᖅᑎᑦᑎᕗᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖᓂᒃ ᐊᑐᐃᓐᓇᐅᑎᑦᑎᓗᓂ
ᐱᔨᑦᑎᕋᐅᑎᓂᒃ ᓂᐅᕕᖅᐸᒃᑐᓄᑦ ᐃᓄᑑᑎᑕᐅᔪᒪᔪᓄᑦ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖᓂᒃ
ᐆᒻᒪᖅᑯᑎᖃᐅᑎᒧᑦ ᐊᒻᒪ ᐆᒻᒪᖁᑎᖃᕐᓗᓂ 100% ᐃᒻᒥᓂᒃ.”
ᐅᓇ ᓄᑖᖅ ᐊᑭᖓ ᐊᒃᑐᐊᓂᖃᕐᓂᐊᖅᑐᖅ ᐆᒻᒪᖁᑎᒥᒃ ᓂᐅᕕᖅᐸᒃᑐᓄᑦ ᐊᒻᒪ/ᐅᕝᕙᓘᓐᓃᑦ ᑕᖅᑭᑕᒫᑦ
ᐊᑭᓕᖅᓱᐃᕙᒃᑐᓄᑦ. ᐆᒻᒪᖅᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᑦ ᕿᒥᕐᕈᓂᐊᖅᑐᑦ ᑐᒃᓯᕋᐅᑎᒥᒃ ᑭᒃᑯᑐᐃᓐᓇᐃᓪᓗ ᐃᓱᒪᒋᔭᖏᓐᓂᑦ
ᑐᓴᕈᒪᓪᓗᑎᒃ. ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ ᑎᓕᐅᕆᕗᑦ ᐱᔪᒪᔪᓄᑦ ᐃᓚᐅᖃᑕᐅᖁᔭᐅᓪᓗᑎᒃ ᑐᓂᓯᓗᑎᒃ ᐅᖃᐅᓯᒃᓴᖏᓐᓂᒃ ᐅᕗᖓ URRC@gov.nu.ca 5:00 ᐅᓐᓄᒃᓴᒃᑯᑦ ᓯᑎᐱᕆ 8, 2025−ᒥ.
ᓇᐅᑦᑎᐅᒪᔾᔪᑎᓄᑦ ᐊᑭᒋᔭᐅᔪᒧᑦ ᐱᓇᔫᑎ ᐊᑐᐃᓐᓇᐅᑎᑕᐅᔪᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑎᒥᖁᑖ ᐃᑭᐊᕿᕕᖓᒍᑦ www.qec.nu.ca, ᐊᑖᒍᑦ “ᑲᒪᒋᔭᐅᕙᒃᑐᓄᑦ” ᑕᐅᓄᖓ ᓂᕈᐊᒐᒃᓴᐅᔪᓂ, ᐊᕕᒃᑐᖅᓯᒪᔪᓂ “ᓂᐅᕕᖅᐸᒃᑐᓄᑦ ᐊᑭᖏᑦ”.