ᐃᓂᒋᔭᐅᔪᒥ ᐅᖅᑰᓴᖅᑎᑦᑎᓂᕐᒧᑦ ᐊᑐᖅᑕᐅᕙᒃᑐᖅ

ᐃᓂᒋᔭᐅᔪᒥ ᐅᖅᑰᓴᖅᑎᑦᑎᓂᕐᒧᑦ ᐊᑐᖅᑕᐅᕙᒃᑐᑦ (DHS−ᖑᓂᕋᖅᑕᐅᒋᓪᓗᑎᒃ), ᖃᐅᔨᒪᔭᐅᒋᓪᓗᑎᒃᑕᐅᖅ ᐊᑐᖅᑕᐅᔪᒥᑦ ᐆᓇᕐᓂᕆᔭᐅᔪᑦ, ᐅᓂᒃᑲᐅᓯᐅᔪᓐᓇᖅᐳᖅ ᐊᑐᖅᑕᐅᔪᓐᓇᖅᐸᒃᖢᓂ ᐱᓕᕆᕝᕕᒋᔭᐅᔪᒥᑦ ᐊᑐᖅᑕᐅᔪᓐᓇᖅᖢᓂ ᐊᑕᐅᓯᕐᒥᖅ ᐱᕝᕕᐅᔪᓐᓇᖅᑐᒥᑦ ᑐᓂᐅᖅᑲᐅᑕᐅᔪᖃᖅᐸᒃᐳᖅ ᐊᖏᕐᕋᕆᔭᐅᔪᓄᑦ, ᑮᓇᐅᔭᓕᐅᕕᐅᔪᓄᑦ ᐃᖅᑲᓇᐃᔭᕐᕕᐅᔪᓄᓪᓗ ᐊᑐᖅᑎᐅᕙᒃᑐᓄᑦ ᐊᑐᕐᓂᐊᕐᓗᓂᔾᔪᒃ ᐃᓂᒥᒃ ᐅᖅᑰᓴᖅᑎᑦᑎᓂᕐᒧᑦ, ᐃᒪᕐᒥᒃ ᐆᓇᖅᑎᑦᑎᓂᕐᒧᑦ ᑲᔪᓯᕙᓪᓕᐊᔪᒥᒡᓗ ᐅᖅᑰᑎᑦᑎᕙᖕᓂᕐᒧᑦ. ᑕᒪᓐᓇ ᓇᓗᔭᐅᔪᓐᓃᖅᐳᖅ ᐊᑐᖅᑕᐅᕙᓪᓕᐊᒃᑲᓐᓂᕈᓐᓇᖅᖢᓂ ᐊᑐᖅᑕᐅᔪᓐᓇᖅᑑᓪᓗᓂ ᐊᐅᓚᑕᕐᓂᖅᑐᑯᓘᓪᓗᓂ ᑲᒪᒋᔭᕐᓂᖅᑐᑯᓪᓗᓂᓗ ᒥᑭᑦᑐᑯᓗᖕᒥᒃ ᐊᐅᓚᑦᑎᓂᕐᒧᑦ ᑲᒪᒋᓂᕐᒧᓪᓗ ᐊᑭᓕᖅᓱᖅᑕᐅᔭᕆᐊᖃᖅᐸᒃᖢᓂ.

ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᑎᒥᖁᑖᓂ, ᐱᓕᕆᔾᔪᑕᐅᔪᓂᑦ ᐆᒻᒪᖅᑯᑦ ᐆᒻᒪᖅᑯᑎᖃᕐᕕᖕᒥᙶᖅᑐᖅ ᐱᔭᐅᕙᒃᐳᖅ ᑐᓂᐅᖅᑲᐅᑕᐅᕙᒃᑐᑎᒍᓪᓗ ᑐᓂᐅᖅᑲᐅᑕᐅᕙᑦᒃᖢᓂ ᐊᑐᖅᑎᐅᕙᒃᑐᓄᑦ ᐊᑐᕈᒪᔭᒥᓄᑦ ᐊᑐᕐᓂᐊᕐᓗᓂᔾᔪᒃ. ᑕᐃᒪᐃᓕᐅᕌᖓᒥᒃ, ᐊᑐᖅᑎᐅᕙᒃᑐᑦ ᐊᑐᙱᓐᓂᖅᓴᐅᕙᒃᐳᑦ 10%−ᒥᒃ ᐅᖓᑖᓄᓪᓘᓐᓃᑦ ᐅᖅᑰᓴᐅᒻᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ. ᑕᒪᓐᓇᑐᐊᖑᙱᒃᑭᓪᓗᓂᓗ, ᐊᑐᖅᑎᐅᕙᒃᑐᑦ ᐅᔾᔨᕆᔭᖃᕐᓂᐊᕆᕗᑦ ᒥᑭᒡᓕᒋᐊᖅᓯᒪᓕᖅᑐᒥᒃ ᐊᐅᓚᑦᑎᓂᕐᒧᑦ ᑲᒪᒋᔭᖃᕐᓂᕐᒧᓪᓗ ᐊᑭᓕᖅᓱᕆᐊᓕᖕᓄᑦ, ᐅᖓᕙᕆᐊᖅᓯᒪᓕᖅᑐᒥᒡᓗ ᐊᑐᕈᓐᓇᕐᓂᕆᔭᖏᓐᓄᑦ ᐅᖅᑰᓴᐅᒻᒧᑦ ᐊᑐᖅᐸᒃᑕᒥᓂ.

DHS−ᖑᓂᕋᖅᑕᐅᔪᖅ ᐅᔾᔨᕐᓇᖅᑐᒻᒪᕆᖕᒥᒃ ᒥᑭᒡᓕᒋᐊᖅᑎᑦᑎᕙᒃᐳᖅ ᐳᔪᕐᓗᖕᒥᒃ ᓯᓚᒧᐊᖅᑎᑦᑎᕙᓪᓕᐊᓂᕐᒥᒃ ᐊᑐᕆᐊᖃᓪᓚᑦᑖᕐᓂᕆᕙᒃᑕᑦᑎᓐᓂᒡᓗ ᐅᖅᓱᐊᓗᒃᓴᓂᒃ ᑕᒫᓂ ᓄᓇᑦᑎᓐᓂ. ᒫᓐᓇᒃᑯᑦ ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᑎᒥᖁᑖ ᐃᓂᒋᔭᐅᔪᓂᒃ ᐆᖅᑰᓴᖅᑎᑦᑎᓂᕐᒧᑦ ᐊᑐᖅᐸᒃᐳᑦ ᐊᑭᓕᖅᓱᖅᑕᐅᑎᑉᐸᒃᖢᒍ ᐃᖃᓗᖕᓂ, ᑲᖏᖅᖠᓂᕐᒥ, ᐊᕐᕕᐊᓂ, ᖁᕐᓗᖅᑐᕐᒥᓗ. ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᓄᓇᓕᖕᓂ ᓇᖕᒥᓂᕆᔭᐅᔪᑦ, ᒐᕙᒪᒋᔭᐅᔪᑦ ᑲᑐᔾᔨᖃᑎᒌᓪᓗ ᐊᑐᖅᐸᖕᓂᖏᓐᓄᑦ ᐱᓕᕆᔾᔪᑕᐅᔪᓂᑦ ᐆᒻᒪᖅᑯᒻᒥᙶᖅᑐᒥᒃ ᐊᑐᖅᑕᐅᔪᓐᓇᖅᑐᒥᒃ ᐅᖅᑰᓴᕐᓂᐊᕐᓗᒍ ᑎᑎᕋᕐᕕᒋᔭᑎᒃ. ᒫᓐᓇᒃᑯᑦ ᐊᑐᖃᑦᑕᖅᐳᒍᑦ ᓇᖕᒥᓂᖅ DHS−ᒋᔭᑦᑎᓐᓂᒃ ᐅᖅᑰᓴᖅᑎᖦᖢᒋᑦ ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᑎᒥᖁᑖᑕ ᑎᑎᕋᕐᕕᖏᓐᓂᒃ ᓄᓇᓯᐅᑎᖃᕐᕕᖏᓐᓂᒡᓗ ᐃᖃᓗᖕᓂ, ᓴᓂᑭᓗᐊᒥ, ᐃᒡᓗᓕᖕᒥ, ᑰᒑᕐᔪᖕᒥ, ᑕᓗᕐᔪᐊᕐᒥ, ᐃᖃᓗᒃᑑᑦᑎᐊᒥ, ᓴᓪᓕᕐᒥᓗ. DHS−ᑕᖃᙱᕐᐸᑦ, 3 ᒥᓕᐊᓐ ᐅᖓᑖᓃᑦᑐᓂᒃ ᓖᑕᓂᒃ ᐅᖅᓱᐊᓗᒃᑲᓐᓂᕐᒥᒃ ᐅᖅᑰᓴᕈᑕᐅᓂᐊᖅᑐᒥᒃ ᐱᔪᖃᕆᐊᖃᕋᔭᖅᐳᖅ ᓄᓇᕗᒻᒥ ᐊᕐᕌᒍᑕᒪᑦ ᐃᓂᒋᔭᐅᔪᓂᒃ ᐅᖅᑰᓴᖅᑎᑦᑎᓂᐊᕐᓗᓂ. ᑕᒪᓐᓇ ᐊᑐᖅᑕᐅᖔᕈᓐᓇᖅᑐᖅ ᐅᕙᑦᑎᓐᓂᒃ ᐱᕕᖃᖅᑎᑦᑎᕗᖅ ᐱᐅᓂᖅᓴᒃᑯᑦ ᐊᑐᕈᓐᓇᕐᓂᕐᒥᒃ ᑎᑭᑎᑦᑕᕆᐊᖃᖅᐸᒃᑕᑦᑎᓐᓂᒃ ᐅᖅᓱᐊᓗᖕᒥᒃ, ᑕᐃᒪᐃᓕᐅᕐᓂᑦᑎᓐᓂᓗ ᒥᑭᒡᓕᒋᐊᖅᑎᑦᑎᕙᒃᖢᑕ ᐃᓯᐊᕿᑎᑕᑦᑎᓐᓂᒃ ᓯᓚᒧᑦ.

ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᐱᐅᓯᑎᑦᑎᕙᓪᓕᐊᕗᑦ ᓄᑖᙳᕆᐊᖅᑎᑦᑎᕙᓪᓕᐊᓪᓗᑎᒡᓗ ᐱᑕᖃᖅᐸᒌᖅᑐᓂᒃ DHS−ᒧᑦ ᐊᑐᖅᑕᐅᕙᒃᑐᓂᒃ ᕿᓂᖅᖢᑎᒡᓗ ᓯᕗᓂᒃᓴᒥ ᐃᓕᐅᖅᑲᖅᑕᐅᔪᒫᖅᑐᓂᒃ ᐊᖏᓪᓕᒋᐊᖅᑎᑕᐅᔪᒫᖅᑐᓂᒡᓗ DHS−ᒧᑦ ᐊᔾᔨᒌᙱᑦᑐᓂ ᓄᓇᓕᖕᓂ. ᑕᒪᓐᓇ ᐱᕕᒃᓴᖃᖅᑎᑦᑎᖃᑦᑕᕐᓂᐊᖅᐳᖅ ᐅᓄᕐᓂᖅᓴᓂᒃ ᐊᑐᖅᑎᐅᕙᒃᑐᓂᒃ ᐊᑐᕈᓐᓇᕐᓂᐊᕐᓗᑎᒃ DHS−ᒥᒃ ᒥᑭᒡᓕᒋᐊᖅᑎᑦᑎᓗᑎᒡᓗ ᐅᖅᑰᓴᐅᑎᖃᕐᓂᕐᒧᑦ ᐊᑭᓕᖅᓱᕆᐊᖃᖅᐸᒃᑕᒥᓂᒃ.