ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᑦ ᑎᒃᑯᐊᖅᑕᐅᖃᑦᑕᖅᑐᑦ ᒥᓂᔅᑕᒧᑦ ᑲᒪᒋᔭᓕᖕᒧᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᖁᔭᖓᑎᒍᑦ, ᑲᑎᒪᔩᑦ ᐊᕐᕕᓂᓕᑦ ᑐᙶᓃᑦᑕᕆᐊᖃᙱᑦᑐᑦ, ᖁᓕᓪᓗ ᐅᖓᑖᓃᑦᑕᕆᐊᖃᙱᖦᖢᑎᒃ ᑲᑎᒪᔩᑦ. ᑲᑎᒪᔨᐅᖃᑕᐅᔪᑦ ᑎᒃᑯᐊᖅᑕᐅᖃᑦᑕᖅᐳᑦ ᐊᕐᕌᒍᓄᑦ ᒪᕐᕉᖕᓄᑦ ᐱᖓᓱᓄᓪᓘᓐᓃᑦ ᓂᑭᑦᑖᖅᖢᑎᒃ, ᐃᑲᔪᖅᐸᒃᖢᑎᒃ ᐆᒻᒪᖅᑯᑎᓕᕆᔨᓂᑦ ᐱᓕᕆᐊᒃᓴᖏᓐᓂᒃ ᑲᔪᓯᑎᑦᑎᓪᓗᑎᒃ, ᐊᔪᕈᓐᓃᖅᓴᖅᐸᓪᓕᐊᑎᑕᐅᓪᓗᑎᒃ ᖃᐅᔨᕙᓪᓕᐊᓪᓗᑎᒡᓗ.
ᒫᓐᓇ 9−ᓂᒃ ᐃᓚᒋᔭᐅᔪᖃᖅᐳᖅ ᐱᔨᑦᑎᕋᖅᑐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑲᑎᒪᔨᖏᓐᓂ.
ᔩᓂ ᐃᕼᐊᓗᐊᒃ − ᑲᑎᒪᑎᑦᑎᔨ
ᔩᓂ ᐃᕼᐊᓗᐊᒃ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᐊᒻᒪ ᒪᐃᔭᐅᓪᓗᓂ ᐃᖃᓗᒃᑑᑦᑎᐊᒥ ᓯᕗᓕᖅᑎᓄᑦ ᐱᓕᕆᖃᑦᑕᖅᓯᒪᓂᑰᓪᓗᓂ ᐊᑐᐊᒐᓕᕆᓂᕐᒥᒃ, ᐊᐅᓚᑦᑎᕝᕕᖃᕐᓂᕐᒥᒃ ᐊᒻᒪ ᑭᒃᑯᑐᐃᓐᓇᓂᒃ ᐊᐅᓚᑦᑎᕝᕕᖃᖅᐸᖕᓂᕐᒥᒃ. ᒪᓕᒐᓕᐅᕐᕕᖕᒥ ᑲᑎᒪᔨᐅᓂᕐᒥᓂ, ᖃᔅᓯᑲᓪᓚᖕᓂ ᒥᓂᔅᑕᐅᖃᑎᒌᓂᒃ ᐱᓕᕆᖃᑦᑕᖅᓯᒪᕗᖅ, ᐃᓚᒋᔭᐅᓪᓗᓂ ᒥᓂᔅᑕ ᑲᒪᒋᔭᒃᓴᖃᖅᑎᑕᐅᓪᓗᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ, ᐱᕚᓪᓕᖅᖢᓂ ᐊᔾᔨᒋᔭᐅᙱᑦᑐᒥᒃ ᑐᑭᓯᐅᒪᓂᕐᒥᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐊᐅᓚᓂᕆᔭᖏᓐᓂᒃ ᐊᐅᓚᑦᑎᕝᕕᖃᖅᐸᖕᓂᖏᓐᓂᒡᓗ. ᐃᖅᑲᓇᐃᔮᕆᖃᑦᑕᖅᓯᒪᔭᖓ ᓇᓗᓇᐃᖅᑕᐅᓯᒪᕗᖅ ᐱᓕᕆᑦᑎᐊᕐᓂᒃᑯᑦ ᓄᓇᓕᖕᓂ ᐅᖃᖃᑎᖃᖅᐸᖕᓂᒃᑯᑦ ᒐᕙᒪᒥᐅᑕᐅᖃᑎᒌᙱᑦᑐᓄᓪᓗ ᓯᕗᓕᖅᑎᐅᕙᒃᖢᓂ ᓄᓇᕘᓕᒫᒥ. ᐃᕼᐊᓗᐊᒃ ᐃᖃᓗᒃᑑᑦᑎᐊᕐᒥᐅᑕᖅ.
ᒫᑕ ᓕᓂᐅ− ᑲᑎᒪᑎᑦᑎᔨᐅᑉ ᑐᒡᓕᐊ
ᓘᒃᑖᖅ ᒫᑕ ᓕᓂᐅ ᑐᑭᓯᐅᒪᓂᖃᑦᑎᐊᖅᐳᖅ ᓄᓇᕐᔪᐊᓕᒫᒥ ᐊᓯᔾᔨᒋᐊᒐᒃᓴᐅᔪᓂᒃ ᐆᒻᒪᖅᑯᑎᓄᑦ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒧᓪᓗ−ᑐᕌᖓᓪᓗᐊᑕᖅᑐᓂᒃ ᐆᒻᒪᖅᑯᒻᒧᑦ ᐊᑐᖅᑕᐅᕙᒃᑐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᑲᑎᒪᔨᖏᓐᓄᑦ. ᒫᓐᓇ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᔨᒻᒪᕆᐅᕗᖅ ᓄᓇᕐᔪᐊᕐᒥ ᐆᒪᔪᓕᕆᓂᕐᒧᑦ ᑮᓇᐅᔭᖃᖅᑎᑦᑎᔨᓄᑦ ᑲᓇᑕᒥ, ᐊᕐᕌᒍᐃᑦ ᖁᓕᑦ ᐅᖓᑖᓂ ᓄᓇᕐᔪᐊᓕᒫᒥ ᐱᓕᕆᖃᑦᑕᖅᓯᒪᓂᑰᓪᓗᓂ ᓯᕿᓂᕐᒧᑦ ᐆᒻᒪᖅᑯᑎᓕᕆᔾᔪᑎᓂᒃ. ᓘᒃᑖᖅ ᓕᓂᐅ ᐱᓯᒪᕗᖅ ᓘᒃᑖᖑᓂᕐᒧᑦ ᐃᓱᒪᒥᐅᑕᓕᕆᓂᕐᒧᑦ ᓯᕿᓂᕐᒧᑦ ᐱᓕᕆᓂᐅᕙᒃᑐᒥ ᓯᓚᑦᑐᖅᓴᕐᕕᒡᔪᐊᒥ ᓂᐅ South Wales−ᒥ, ᐊᒻᒪᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᖃᐅᔨᓴᖅᑐᓕᕆᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ ᐅᐊᑐᓘᒥ. ᓘᒃᑖᖅ ᓕᓂᐅ ᐃᖃᓗᖕᒥᐅᑕᐅᕗᖅ.
ᐊᓕᒃᔅ ᑯᒃ
ᐋᓕᒃᔅ ᑯᒃ ᓇᖕᒥᓂᖃᖅᑎᐅᔪᖅ ᓴᓗᒪᔪᒥᒡᓗ ᐆᒻᒪᖅᑯᑎᖃᕐᓂᕐᒧᑦ ᑭᒡᒐᖅᑐᐃᔨᐅᕗᖅ ᐱᓕᕆᖃᑦᑕᖅᓯᒪᓂᑰᓪᓗᓂ ᐱᓕᕆᕝᕕᒋᔭᐅᔪᒥ ᐊᐅᓚᑦᑎᕝᕕᖃᖅᐸᖕᓂᕐᒥᒃ ᐅᑭᐅᖅᑕᖅᑐᒥᓗ ᓇᑉᐸᖅᑎᖅᑕᐅᓯᒪᔪᓄᑦ ᐱᕙᓪᓕᐊᓂᕆᔭᐅᔪᒥᒃ. ᐃᖅᑲᓇᐃᔮᒥᓂᒃ ᐱᒋᐊᓚᐅᖅᓯᒪᓪᓗᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ ᐊᐅᔭᒃᑯᑦ ᐃᓕᓐᓂᐊᖅᑎᐅᓪᓗᓂ ᑭᖑᓂᐊᒍᓪᓗ ᖁᕝᕙᖅᐸᓪᓕᐊᓪᓗᓂ ᐊᐅᓚᑦᑎᔨᒻᒪᕆᙳᖅᖢᓂ, ᒫᓐᓇ ᐊᖓᔪᖅᑳᕆᔭᐅᕗᖅ ArchTech−ᑯᓐᓄᑦ, ᓄᓇᖃᖅᑳᖅᓯᒪᔪᓄᑦ−ᓇᖕᒥᓂᕆᔭᐅᔪᖅ ᑕᐅᑦᑐᒃᓴᖓᓄᑦ−ᓴᓇᓂᕐᒧᑦ ᐱᓕᕆᔨᒋᔭᐅᓪᓗᓂ, ᐆᒻᒪᖅᑯᑎᓄᓪᓗ ᐊᔪᙱᓛᖑᓪᓗᓂ ᖃᒪᓂ'ᑐᐊᕐᒥ. ᑯᒃ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᖅᓯᒪᔪᖅ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ ᓯᕗᓕᖅᑎᐅᓂᕐᒧᑦ ᓴᐃᓐᑦ ᕗᕌᓐᓯᔅ Xavier ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᖃᔅᓯᑲᓪᓚᖕᓂ ᑲᓇᑕᒥ ᓄᓇᖃᖅᑳᖅᓯᒪᔪᑦ ᓴᓗᒪᔪᓂᒃ ᐆᒻᒪᖅᑯᑎᓕᕆᓂᕐᒧᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᐅᖃᑕᐅᓪᓗᓂ. ᑯᒃ ᖃᒪᓂ'ᑐᐊᕐᒥᐅᑕᐅᕗᖅ.
ᓇᐃᔭᕝ ᑳᓐ
ᓇᔭᑉ ᑳᓐ ᐱᓕᕆᖃᑦᑕᖅᓯᒪᓂᑰᕗᖅ ᑮᓇᐅᔭᓕᕆᓂᕐᒧᑦ ᓯᕗᓕᖅᑎᐅᓂᕐᒥᒃ ᐱᔨᑦᑎᕋᖃᑦᑕᖅᓯᒪᓪᓗᓂᓗ ᐱᓪᓗᐊᑕᕐᓂᒃ ᑭᒃᑯᑐᐃᓐᓇᓄᑦ ᐊᐅᓚᑕᐅᕙᒃᑐᓂᒃ ᑮᓇᐅᔭᓕᕆᔨᒻᒪᕆᐅᓂᕐᒥᒃ ᓯᕗᓕᖅᑎᒋᔭᐅᓂᕐᒧᓪᓗ ᐃᓂᒋᔭᐅᕙᒃᑐᓂᒃ ᓄᓇᕘᓕᒫᒥ. ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᐃᓚᖃᖅᐳᑦ ᑮᓇᐅᔭᓕᕆᔨᒻᒪᕆᐅᓪᓗᓂ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐊᕕᒃᓯᒪᓂᕐᒥᓗ ᑮᓇᐅᔭᓕᕆᔨᒋᔭᐅᓪᓗᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ. ᖃᐅᔨᓴᖅᑐᓕᕆᓂᕐᒧᑦ ᐃᓕᑕᕆᔭᐅᔾᔪᑎᑖᖅᓯᒪᔪᖅ ᓈᓴᐅᓯᕆᓂᕐᒥᒃ ᐊᒻᒪ ᑮᓇᐅᔭᓕᕆᓂᕐᒥᒃ Peshawar ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪᓗ ᐱᔭᕇᕈᓯᐊᖃᖅᖢᓂ ᒐᕙᒪᒃᑯᓐᓂ ᐊᒡᓚᕝᕕᓕᕆᓂᕐᒧᑦ Flinders ᓯᓚᑦᑐᖅᓴᕐᕕᒡᔪᐊᕐᒥ. ᒥᔅᑕ ᒃᕼᓐ ᐃᖃᓗᒥᐅᑕᐅᔪᖅ.
ᕌᐱᓐ ᐊᓇᕈᐊᖅ
ᕌᐱᓐ ᐊᓇᕈᐊᖅ ᐊᕐᕌᒍᐃᑦ ᐊᕙᑎᑦ ᐅᖓᑖᓄᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᓕᕆᖃᑦᑕᖅᓯᒪᔪᖅ, ᒪᓕᒐᕐᓂᑦ ᖃᐅᔨᓴᕐᓂᕐᒥᑦ, ᒐᕙᒪᒥᐅᑕᐅᖃᑎᒌᓂᓪᓗ ᓯᕗᓕᖅᑎᐅᓂᕐᒥᑦ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᒫᓐᓇ ᐱᓕᕆᐊᒃᓴᓕᕆᔨᒻᒪᕆᒃ ᐃᓄᓕᕆᔨᒃᑯᓐᓂ, ᑐᑭᒧᐊᒃᑎᑦᑎᓪᓗᓂ ᖃᓄᖅᑑᕈᑎᒃᓴᓄᑦ ᐊᑐᐊᒐᕐᓂᒃ ᐊᒻᒪ ᒪᓕᒐᓕᐊᖑᔪᒪᔪᓂᒃ ᐱᓕᕆᐊᖑᕙᓪᓕᐊᔪᒪᔪᓂᒃ. ᐱᓕᕆᐊᖃᓪᓚᕆᒍᒪᓪᓗᓂ ᓴᙱᒃᑎᒋᐊᖅᑎᑦᑎᓂᕐᒥᒃ ᐃᓄᖕᓂᒃ ᑭᒡᒐᖅᑐᐃᓂᕐᒥᒃ ᐊᐅᓚᑦᑎᕝᕕᖃᕐᓂᕐᒥᒃ, ᐊᓇᕈᐊᖅ ᐊᓂᒍᐃᓯᒪᕗᖅ ᓯᓚᑦᑐᖅᓴᕐᕕᒡᔪᐊᒥ ᐋᑐᕚᒥ ᒪᓕᒐᓕᕆᓂᕐᒧᑦ ᐱᓕᕆᐊᖑᕙᒃᑐᒥᒃ, ᑳᕈᑕᓐ ᓯᓚᑦᑐᖅᓴᕐᕕᒡᔪᐊᖓᑕ ᒐᕙᒪᓕᕆᓂᕐᒧᑦ ᖃᐅᔨᓴᖅᓯᓂᕐᒧᑦ ᐱᓕᕆᐊᖑᕙᒃᑐᒥᒃ, ᓄᓇᕗᑦ ᓯᕗᓂᒃᓴᕗᕗᒥᒡᓗ ᐱᓕᕆᐊᖑᕙᒃᑐᒥᒃ. ᐊᓇᕈᐊᖅ ᐃᖃᓗᖕᒥᐅᑕᐅᕗᖅ.
ᐹᓪ ᖃᓗᔾᔭᖅ
ᐹᓪ ᖃᓗᔾᔭᖅ ᐊᕐᕌᒍᑦ 40 ᐅᖓᑖᓄᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖃᑦᑕᖅᓯᒪᔪᖅ ᓯᕗᓕᖅᑎᓄᓪᓗ ᕼᐋᒻᒪᓚᒃᑯᓐᓂ, ᓄᓇᕘᒥ, ᐊᒻᒪ ᐃᓄᐃᑦ ᒐᕙᒪᖏᑕ ᑲᑐᔾᔨᖃᑎᒌᖏᓐᓂ ᓄᓇᕗᒻᒥ. ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᓯᕗᓕᖅᑎᐅᖃᑦᑕᖅᓯᒪᕗᑦ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᕆᔭᐅᓪᓗᓂ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᕆᔭᐅᓪᓗᓂ, ᐊᒻᒪ ᑲᖏᖅᖠᓂᕐᒥ ᒪᐃᔭᐅᓪᓗᓂ. ᐃᓄᒃᑎᑐᑦ ᐅᖃᓪᓚᒍᓐᓇᑦᑎᐊᖅᑐᖅ, ᖃᐅᔨᒪᓂᖃᑦᑎᐊᖅᑐᖅ ᖃᓄᖅᑑᕈᑎᒃᓴᓄᑦ ᐸᕐᓇᐅᑎᓂᒃ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐊᒻᒪ ᐃᓚᓕᐅᔾᔨᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᒐᕙᒪᒃᑯᑦ ᐊᒡᓚᕝᕕᓕᕆᔾᔪᑎᖏᓐᓄᑦ. ᐊᓇᕈᐊᖅ ᐃᖃᓗᖕᒥᐅᑕᐅᕗᖅ.
ᑐᕌᕕᔅ ᑲᓪᓗᐊᒃ
ᑐᕌᕙᔅ ᑲᓪᓗᐊᒃ ᐊᐅᓚᑦᑎᓂᕐᒧᑦ ᓯᕗᓕᖅᑎᐅᕗᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ, ᐱᕚᓪᓕᖅᐸᓪᓕᐊᓪᓗᓂ ᐱᓕᕆᔾᔪᑎᓄᑦ ᐊᐅᓚᑦᑎᔨᐅᓂᕐᒧᓪᓗ ᐃᒡᓗᓂᒃ ᓱᕋᒃᓯᒪᔪᓕᕆᔨᐅᓂᕐᒧᑦ ᓴᓇᔨᒻᒪᕆᐅᓂᕐᒧᑦ ᓯᕗᓕᖅᑎᙳᖅᐸᓪᓕᐊᓂᕐᒧᑦ. ᒫᓐᓇ ᑐᑭᒧᐊᒃᑎᑦᑎᔨᒻᒪᕆᒃ, ᐱᓕᕆᐊᒃᓴᓄᑦ − ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᖅ, ᑲᒪᒋᔭᖃᖅᖢᓂ ᓄᓇᕗᒻᒥ ᐃᒡᓗᓕᕆᓂᕐᒧᑦ ᑲᔪᓯᑎᑦᑎᓂᕐᒥᒃ, ᖃᓄᐃᓕᐅᖅᐸᓪᓕᐊᓂᐊᕐᓂᕐᒧᑦ ᐱᓕᕆᖃᑎᒌᖕᓂᕐᓂᒃ, ᐱᓕᕆᐊᒃᓴᓄᓪᓗ ᐊᑐᐊᒐᕐᓂᒃ ᐱᕙᓪᓕᐊᑎᑦᑎᓂᕐᒥᒃ. ᐃᓄᒃᑎᑐᑦ ᐅᖃᓪᓚᒍᓐᓇᑦᑎᐊᖅᖢᓂ, ᑲᓗᐊᒃ ᐃᓚᓕᐅᔾᔨᔪᒪᓪᓚᕆᒃᐳᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑭᒃᑯᑐᐃᓐᓇᓄᑦ ᐱᓕᕆᐊᖑᕙᒃᑐᓄᑦ ᓇᓗᙱᑦᑎᐊᕈᒪᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᑲᔪᓯᓂᖃᑦᑎᐊᖅᑐᒃᑯᑦ ᐊᖑᒻᒪᑎᒐᓗᐊᕐᒪᖔᑕ ᐱᔭᐅᔭᕆᐊᓕᖕᓄᑦ ᓄᓇᕗᒻᒥᐅᓄᑦ. ᑲᓗᐊᒃ ᐊᕐᕕᐊᕐᒥᐅᑕᐅᕗᖅ.