ᐱᓕᕆᐊᒃᓴᑦ
ᐃᖢᕐᕆᑎᑦᑎᔪᒪᒍᕕᑦ ᑐᙵᓇᕐᓗᑎᓪᓗ ᓄᓇᑦᑎᓐᓄᑦ ᓴᖅᑭᑎᑦᑎᓗᑎᑦ ᑕᑎᒋᔭᒃᓴᐅᔪᓂᑦ ᑲᒪᑦᑎᐊᖅᑐᓂᓪᓗ ᐆᒻᒪᖅᑯᑎᓂᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.
ᑕᐅᑐᙳᐊᖅᑕᑦ
ᐆᒻᒪᕆᑦᑎᐊᖅᑐᖅ ᓄᓇᕗᑦ, ᐊᐅᓚᑕᐅᓪᓗᓂ ᐊᓯᐊᒍᑦ ᐊᐅᓚᔪᓐᓇᐅᑏᑦ ᐊᒻᒪᓗ ᓄᓇᓕᖕᓂ-ᑐᕌᖓᔪᑦ ᐱᒋᐊᖅᑎᑕᐅᓯᒪᔪᑦ.
ᐅᒃᐱᕆᔭᖏᑦ
1. ᐊᑦᑕᕐᓇᖅᑕᐃᓕᒪᓂᖅ
ᐆᒻᒪᖅᑯᑎᖃᖅᑎᑦᑎᕙᒃᐳᒍᑦ ᓄᓇᓕᖕᓂ, ᑭᓯᐊᓂ ᐊᑦᑕᕐᓇᖅᑕᐃᓕᒪᑎᑦᑎᕙᒃᐳᒍᑦ ᐆᒻᒪᖅᑯᑎᓂᑦ ᖃᓄᓕᒫᑦᑎᐊᖅ ᐱᓕᕆᐊᕆᔭᑦᑎᓐᓂ.
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ, ᐊᑦᑕᕐᓇᖅᑕᐃᓕᒪᓂᖅ ᕿᑐᑦᑐᒐᐅᔭᕐᒥᒃ ᖃᐅᔨᓴᕐᓂᑐᐃᓐᓇᐅᙱᒻᒪᑦ− ᐃᓱᒪᒋᔭᐅᖏᓐᓇᐅᔭᕐᒪᓪᓕ. ᓱᕋᒃᓯᒪᔪᓂᒃ ᐱᖁᑎᓂᒃ ᓴᓇᖃᑦᑕᕋᓗᐊᕈᑦᑕ, ᓂᓪᓚᓱᑦᑐᒻᒪᕆᖕᒥ ᐱᓕᕆᖃᑦᑕᕋᓗᐊᕈᑦᑕ, ᐃᑲᔪᖅᑐᐃᖃᑦᑕᕈᑦᑕᓘᓐᓃᑦ ᓄᓇᓕᑦᑎᓐᓂ, ᐅᔾᔨᖅᓱᖃᑦᑕᐅᑎᖃᖅᑕᖅᐳᒍᑦ. ᐋᖅᑭᒃᑕᓕᒫᕗᑦ ᒪᓕᖃᑦᑕᖅᑐᑦ ᓴᐳᑎᔪᒪᓪᓗᒋᑦ ᐃᓄᖁᑎᒋᔭᕗᑦ, ᐊᑭᓕᖅᓱᐃᕙᒃᑐᑦ, ᐊᒻᒪᓗ ᐊᕙᑎᕗᑦ ᐱᔨᑦᑎᕋᖅᑕᑦᑎᓐᓂ.
2. ᑕᑯᒃᓴᐅᑦᑎᐊᕐᓂᖅ
ᑐᑭᓯᓇᑦᑎᐊᖅᑐᑦ, ᐅᒃᑯᐃᖓᑦᑎᐊᖅᖢᑎᒃ, ᓱᓕᑦᑎᐊᖅᐸᒃᖢᑎᒡᓗ.
ᐅᒃᐱᕈᓱᒃᐳᒍᑦ ᒪᑐᐃᖓᑦᑎᐊᕐᓂᒃᑯᑦ ᐅᒃᐱᕆᖃᑦᑕᐅᑎᓕᕈᓐᓇᕋᑦᑕ. ᑐᓴᐅᒪᖃᑎᒌᖃᑦᑕᕐᓂᑦᑎᓐᓂᒃ ᐊᑭᓕᖅᓱᐃᕙᒃᑐᓂᑦ ᖃᓄᖅ ᑐᓴᐅᒪᑎᑦᑎᖃᑦᑕᕐᒪᖔᑦᑕ ᐱᓕᕆᖃᑎᒋᔭᑦᑎᓐᓂ ᐃᖅᑲᓇᐃᔭᖅᑎᓂᓪᓗ, ᑐᑭᓯᓇᑦᑎᐊᖃᑦᑕᕈᒪᕗᒍᑦ, ᓈᒻᒪᖅᑯᑦᑎᑦᑎᐊᖅᐸᒡᓗᑕ, ᓱᓕᑦᑎᐊᖅᐸᒡᓗᑕᓗ. ᐃᔨᖅᓯᒪᔪᖃᙱᖦᖢᓂ ᐱᓕᕆᐊᒃᓴᑦᑎᓐᓂ−ᐊᖏᖅᓯᒪᑦᑎᐊᖅᐳᒍᓪᓕ ᑭᒃᑯᓕᒫᑦ ᑐᓴᐅᒪᑎᑦᑎᐊᕈᒪᓪᓗᒋᑦ ᐃᓚᐅᑎᑦᑎᐊᖅᐸᒡᓗᒋᓪᓗ.
3. ᐃᒃᐱᒍᓱᑦᑎᐊᕐᓂᖅ
ᐃᓕᖅᑯᓯᑦᑎᓐᓂ ᑐᙵᕕᓕᒃ. ᒪᓕᑦᑎᐊᖅᑐᑦ ᖃᓄᐃᓕᐅᕈᑕᐅᔪᒥᑦ.
ᐃᒃᐱᒍᓱᑦᑎᐊᕐᓂᖅ ᑐᙵᕕᓪᓗᐊᑕᐅᔪᖅ ᑲᑎᙵᖃᑎᒌᒍᓐᓇᕐᓂᑦᑎᓐᓄᑦ−ᐱᓕᕆᖃᑎᒋᔭᑦᑎᓐᓂ, ᐱᓕᕆᖃᑎᑦᑎᓐᓂᒃ, ᓄᓇᓕᑦᑎᓐᓂᓗ ᐱᔨᑦᑎᕋᖅᑕᑦᑎᓐᓂᒃ. ᐅᐱᒍᓱᒃᐳᒍᑦ ᐊᔾᔨᒌᙱᑦᑐᓂᒃ ᐃᓱᒪᒋᔭᐅᔪᓂᒃ, ᓈᓚᒃᐸᒃᖢᑕ ᐱᓂᐊᕐᓂᕋᖅᑐᓂᒃ, ᖃᐅᔨᒪᑦᑎᐊᕋᓱᒃᐸᒃᖢᑕᓗ ᑭᒃᑯᓕᒫᑦ ᐱᒻᒪᕆᐅᒋᔭᖏᓐᓂᒃ. ᐅᖃᐅᓯᑐᐃᓐᓇᐅᙱᑦᑐᖅ−ᓴᖅᑭᖃᑦᑕᖅᑕᕗᑦ, ᖃᐅᑕᒫᑦ.
4. ᐱᓕᕆᖃᑎᒌᖕᓂᖅ / ᑲᑐᔾᔨᖃᑎᒌᖕᓂᖅ
ᐱᓕᕆᖃᑎᒌᖕᓂᒃᑯᑦ ᓴᙱᓂᖅᓴᐅᖏᓐᓇᐅᔭᖅᐳᑦ.
ᑲᔪᓯᑦᑎᐊᕐᓂᕗᑦ ᐱᕈᖅᐸᓪᓕᐊᕗᖅ ᑲᑐᔾᔨᖃᑎᒌᖕᓂᒃᑯᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ, ᖃᐅᔨᒪᔪᒍᑦ ᐊᔾᔨᒌᖏᑦᑐᓂᒃ ᐃᓱᒪᒋᔭᐅᔪᓂ ᐊᔪᙱᓐᓂᕆᔭᐅᔪᓂᓪᓗ ᑲᑎᑎᑦᑎᕙᒡᓗᑕ ᐋᖅᑭᒃᒋᐊᕈᑎᒃᓴᑦᑎᐊᕙᖕᓂᒃ ᓴᖅᑭᑎᑦᑎᔪᓐᓇᖅᓯᔪᓐᓇᖅᐳᒍᑦ. ᐱᓕᕆᖃᑎᒋᕙᒃᑕᑦᑎᓐᓂ ᐱᓕᕆᖃᑎᖃᕋᓗᐊᕈᑦᑕ ᓄᓇᑦᑎᓐᓃᑦᑐᓂᓪᓘᓐᓃᑦ, ᐊᓯᑦᑎᓐᓂ ᑕᑎᖃᓲᖑᕗᒍᑦ ᑐᕌᒐᑦᑎᓐᓂ ᑲᔪᓯᑎᑦᑎᓇᓱᒃᖢᑕ. ᓲᖃᐃᒻᒪ, ᐱᐅᓛᑦ ᓴᖅᑭᓲᑦ ᐊᑕᐅᓯᐅᓪᓗᑕ ᐱᓕᕆᑎᓪᓗᑕ.
5. ᓵᑕᐅᔪᓐᓇᕐᓂᖅ
ᓇᖕᒥᓂᕆᓗᒍ. ᑲᔪᓯᑎᓪᓗᒍ. ᐱᐅᓯᒋᐊᖅᑎᓪᓗᒍ.
ᑲᒪᒋᖃᑦᑕᖅᑕᕗᑦ ᐱᓕᕆᐅᕗᑦ, ᐃᓱᒪᓕᐅᕈᑎᕗᑦ, ᐊᒃᑐᐃᓂᕆᔭᕗᓪᓗ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ, ᓵᑕᐅᔪᓐᓇᕐᓂᖅ ᑐᑭᖃᖅᐳᖅ ᒪᓕᑦᑎᐊᕐᓂᕐᒥᑦ ᐊᖏᕈᑎᒋᓯᒪᔭᑦᑎᓐᓂᑦ ᕿᓃᓐᓇᖅᐸᒡᓗᑕᓗ ᐱᐅᓯᕚᓪᓕᕈᑎᒃᓴᓂᒃ. ᑲᑉᐱᐊᓱᙱᑦᑐᒍᑦ ᐊᒃᓱᕈᕐᓇᖅᑐᓂᒃ ᐱᓕᕆᓇᓱᒋᐊᒃᓴᖅ ᑲᑎᙵᖃᑎᒋᓗᒋᑦ ᐃᓕᑦᑎᕝᕕᒋᓗᒋᓪᓗ ᓯᕗᓂᒃᓴᖃᑦᑎᐊᕐᓂᖅᓴᐅᖁᓪᓗᒋᑦ.
6. ᑕᑎᒋᔭᐅᔪᓐᓇᕐᓂᖅ
ᐊᑐᕈᓐᓇᑦᑎᐊᖅᑐᓂᑦ ᐆᒻᒪᖅᑯᑎᖃᕐᓂᖅ. ᑕᑎᒋᔭᐅᔪᓐᓇᑦᑎᐊᖅᑐᑦ ᐃᓄᐃᑦ.
ᓄᓇᓕᕗᑦ ᐅᕙᑦᑎᓐᓂᒃ ᑕᑎᖃᕐᒪᑕ, ᑕᒪᓐᓇᓗ ᐱᒻᒪᕆᐅᑎᑉᐸᕗᑦ. ᑕᑎᒋᔭᐅᔪᓐᓇᕐᓂᖅ ᖃᐅᒻᒪᖅᑯᑎᓂᒃ ᐃᑯᒪᑎᑦᑎᑐᐃᓐᓇᕐᓂᐅᙱᒻᒪᑦ—ᐅᒃᐱᕆᔭᐅᔪᓐᓇᕆᐊᖃᖅᐳᒍᓪᓕ ᐱᓕᕆᔨᐅᓪᓗᑕ ᐃᖏᕐᕋᑎᑦᑎᕙᒃᖢᑕ ᐅᓪᓗᓕᒫᑦᑎᐊᖅ. ᖃᓄᐃᓕᖓᒐᓗᐊᖅᐸᑕ, ᐆᒻᒪᖅᑯᑎᓕᕆᔨᒃᑯᑦ ᐊᑐᐃᓐᓇᐅᑎᑦᑎᔪᒪᓪᓚᑦᑖᖅᐳᑦ ᐊᔾᔨᒌᒥᑦ, ᐱᔨᑦᑎᕋᕈᓐᓇᑦᑎᐊᖅᑐᓂᒃ ᐃᓄᖕᓄᑦ ᑕᑎᒋᔭᐅᔪᓐᓇᖅᑐᓂᑦ.