ᐃᖃᓗᐃᑦ, ᓄᓇᕗᑦ – ᔫᓂ, 16, 2026 – ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖ (QEC) ᓵᖓᓃᓚᐅᖅᑐᑦ ᓄᓇᕗᒻᒥ ᐃᖅᑲᖅᑐᐃᔨᒃᑯᑦ ᐅᓪᓗᒥ ᐱᔾᔪᑎᖃᖅᑐᓂ ᐃᖅᑲᖅᑐᕋᔅᓴᐅᓂᖏᓐᓄᑦ QEC ᐊᑖᓂ ᐊᑦᑕᓇᐃᖅᓯᒪᓂᕐᒧᑦ ᐱᖁᔭᖅ ᐊᑦᑐᐊᓂᓕᓐᓄᑦ ᐱᐅᖏᑦᑐᒥᑦ ᐱᓂᕐᓗᓐᓂᐅᓚᐅᖅᑐᒥᑦ ᓇᐅᔮᓂᑦ ᔪᓚᐃ 5, 2024, ᓴᖅᑭᑎᑦᑎᓚᐅᖅᑐᑦ ᐃᓅᔪᓐᓃᕐᓂᖓᓄᑦ QEC ᐅᐊᔭᓕᕆᔨ.
QEC ᐸᓯᔭᔅᓴᐅᓂᕋᓚᐅᖅᑐᑦ ᐊᑕᐅᓯᕐᒧᑦ ᐃᖅᑲᑐᕋᔅᓴᐅᔾᔪᑎᒧᑦ ᐊᑖᓂ ᐃᓚᖓ 4(1)(b) ᐅᑯᓇᓂ ᐊᑦᑕᓇᐃᖅᓯᒪᓂᕐᒧᑦ ᐱᖁᔭᖅ – ᑖᓐᓇ ᐅᕙᓂ ᐅᕝᕙᓘᓐᓃᑦ ᖃᓂᒋᔭᖓᓂ ᔪᓚᐃ 5, 2024, QEC ᐃᖅᑲᓇᐃᔭᖅᑎᑦᑎᔨᐅᓪᓗᓂ ᐊᑐᖏᓐᓂᖃᓚᐅᖅᑐᑦ “ᐊᑕᖏᕐᓗᒋᑦ ᓈᒻᒪᓐᓂᖃᖅᑐᓂᑦ ᓯᕗᓂᐊᒍᑦ ᖃᐅᔨᒪᓇᓱᐊᓂᕐᒧᑦ ᐊᒻᒪ ᐊᖏᕐᓗᑎᒃ ᐊᒻᒪ ᐱᓕᕆᐊᖃᕐᓗᑎᒃ ᐊᑕᖏᖅᑐᓂᑦ ᓈᒻᒪᓐᓂᖃᖅᑐᓂᑦ ᐊᑐᖅᑕᐅᔪᓂᑦ ᐊᒻᒪ ᐊᑐᖅᑕᐅᔭᕆᐊᓕᓐᓂᑦ ᓇᓗᓇᐃᕐᓗᒍ ᐋᓐᓂᐊᖅᑐᓕᕆᓂᕐᒧᑦ ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᐃᓄᓕᒫᓄᑦ, ᐱᖃᓯᐅᑎᓪᓗᓂ ᓄᐊ ᐸᓂᔪᒃ… ᓯᕗᓂᐊᒍᑦ ᐊᒻᒪ ᐃᖅᑲᓇᐃᔭᖅᑎᓪᓗᒍ ᓄᐊ ᐸᓂᔪᒃ ᐅᕙᓂ ᐅᕝᕙᓘᓐᓃᑦ ᐃᓗᐊᓂ ᑐᐊᕕᕐᓇᖅᑐᓄᑦ ᐆᒻᒪᖅᑯᑎᓕᐅᕈᑎᒧᑦ ᓇᐅᔮᑦ ᐆᒻᒪᖅᑯᑎᓕᐅᕈᑎᖃᕐᕕᖓᓂ.”
ᐊᑕᖏᖅᑐᑎᒃ ᐊᓯᖏᑦ ᑎᓴᒪᐅᔪᖅᑐᑦ ᐃᖅᑲᖅᑐᕋᔅᓴᐅᔾᔪᑏᑦ ᐲᖅᑕᐅᓚᐅᖅᑐᑦ ᑐᔅᓯᕌᖑᓪᓗᓂ ᐃᖅᑲᖅᕋᔅᓴᖑᖅᑎᑦᑎᔩᑦ.
QEC ᐊᒻᒪ ᐃᖅᑲᖅᕋᔅᓴᖑᖅᑎᑦᑎᔩᑦ ᑐᓂᓯᓚᐅᖅᑐᑦ ᑲᑐᑎᔭᐅᔪᒥᑦ ᑐᓂᔭᐅᔪᒥᑦ ᖃᓄᐃᓕᑎᑕᐅᓂᖓᓄᑦ ᐃᖅᑲᖅᑐᐃᕕᒻᒧᑦ. QEC ᐊᖏᓚᐅᖅᑐᑦ ᐊᑭᓖᑎᑕᐅᓗᑎᒃ ᐊᖏᓂᖃᖅᑐᓂᑦ $240,000 ᐊᑭᓕᐅᑎᒋᔭᐅᓂᐊᖅᑐᑦ ᐃᖅᑲᓇᐃᔭᖅᑎᓄᑦ ᓴᐳᒻᒥᔭᐅᓂᖏᓐᓄᑦ ᑮᓇᐅᔭᐃᑦ, ᐃᓚᒋᓗᒋᑦ 15% ᐃᓅᔪᓐᓃᖅᑐᒧᑦ ᐊᑭᓕᒃᑲᓐᓂᕆᐊᓖᑦ.
“ᒪᕐᕈᐸᓘᒃ ᐊᕐᕌᒎᒃ ᖄᖏᖅᓯᒪᓕᖅᑐᑦ ᔭᒐᐃᔪᒐᑦᑎᒍᓂ ᐃᖅᑲᓇᐃᔭᖃᑎᕗᑦ ᐱᐅᖏᑦᑐᒥᑦ ᐱᓂᕐᓗᓐᓂᐅᔪᒥᑦ ᐊᒻᒪ ᐅᓪᓗᕐᒥᑦ ᖄᖏᖅᓯᒪᔪᖃᖏᑦᑐᖅ ᐃᖅᑲᐅᒪᐃᓐᓇᖅᑐᑎᒍ ᒥᔅᑕ ᐸᓂᔪᒃ ᐃᖅᑲᐅᒪᔭᐅᓂᖓᓄᑦ. ᐃᓱᒪᒌᓐᓇᖅᑕᕗᑦ ᐃᓚᖏᑦ, ᓄᓇᓕᖓ ᐊᒻᒪ ᑕᐃᒃᑯᓕᒫᑦ ᖃᐅᔨᒪᓚᐅᖅᑕᖓᓂ,” ᐅᖃᖅᑐᖅ ᐆᕐᓇᔅᑦ ᑕᒡᓚᔅ, ᐊᖏᔪᖅᑳᖅ ᐊᒻᒪ ᐊᐅᓚᑦᑎᔨᒻᒪᕆᖓ QEC. “ᒪᓕᒐᖅᑎᒍᕐᑐᓂᑦ ᑖᓐᓇ ᐅᑎᖅᑎᒍᓐᓇᖏᑕᕗᑦ ᔭᒐᐃᓂᐅᔪᖅ. ᐊᖏᖅᑕᕗᑦ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᖅᑕᖓ, ᐊᒻᒪ ᐅᐱᒋᓂᐊᖅᑕᕗᑦ ᒥᔅᑕ ᐸᓂᔪᒃ ᐃᖅᑲᐅᒪᔭᐅᓂᖓᓄᑦ ᐅᕙᒍᑦ ᖃᓄᐃᓕᓯᒋᐊᕈᑎᖏᑎᒍᑦ, ᖃᐅᑕᒫᑦ, ᐊᑦᑕᓇᐃᖅᓯᒪᓂᖅ ᑕᐃᒪᐃᖏᓐᓇᕐᓗᓂ ᕿᑎᐊᓃᓪᓗᓂ ᑭᓱᓕᒫᓂᑦ ᖃᓄᐃᓘᖅᑕᑎᓐᓂ ᐅᕙᓂ QEC.”
ᑭᖑᓂᐊᒍᑦ ᖃᓄᐃᓕᓂᐅᓚᐅᖅᑐᒥᑦ, QEC ᑎᒥᐅᑉ ᐃᓗᐊᓂ ᖃᐅᔨᓴᕐᓂᖃᓚᐅᖅᑐᒍᑦ ᐊᒻᒪ ᑐᓂᓪᓗᑎᒍ ᖃᐅᔨᔭᕗᑦ ᐅᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC). QEC ᐱᓕᕆᖃᑎᒋᓚᐅᖅᑕᖏᑦ ᐊᑕᖏᖅᑐᒥ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᐅᔨᓴᓂᕐᒥᑦ.
ᐊᖏᕈᑎᐅᓯᒪᔪᑦ ᐅᖃᐅᓯᔅᓴᐃᑦ ᖃᓄᐃᓕᓂᐅᔪᒥᑦ ᑖᒃᑯᐊ QEC ᐱᑕᖃᕆᐊᖃᖅᑎᑦᑎᓚᐅᖅᑐᑦ ᐊᑦᑕᓇᐃᖅᓯᒪᓂᕐᒧᑦ ᐱᓕᕆᐊᒥᑦ ᐊᒻᒪ ᐃᓕᓐᓂᐊᓂᕐᒥᑦ ᐃᓂᖓᓃᑦᑐᒥᑦ ᑕᐃᔅᓱᒪᓂᐅᑎᓪᓗᒍ ᖃᓄᐃᓕᓂᐅᔪᒥᑦ. QEC ᐃᓕᓴᖅᓯᔪᑦ, ᑭᓯᐊᓂᓕ, ᐊᑦᑕᓇᐃᖅᓯᒪᓂᕐᒧᑦ ᐊᑐᐊᒐᐃᑦ, ᐊᑐᖅᑕᐅᔭᕆᐊᓖᑦ ᐊᒻᒪ ᐃᓕᓐᓂᐊᓂᕐᒧᑦ ᐊᑐᖅᑎᑕᐅᔭᕆᖃᖅᑐᑦ, ᐊᔭᐅᖅᑕᐅᑲᓐᓂᕐᓗᑎᒃ ᐊᒻᒪ ᐃᓅᓯᕐᒦᓪᓗᑎᒃ ᖃᐅᑕᒫᑦ.
ᑭᖑᓂᑦᑎᐊᖓᒍᑦ ᖃᓄᐃᓕᓂᐅᔪᒥᑦ, QEC ᐊᔭᐅᖅᓯᒋᐊᓚᐅᖅᑐᑦ ᑎᒥᓕᒫᒥ ᐊᑦᑕᓇᐃᖅᓯᒪᓂᕐᒧᑦ ᓄᖅᑲᖅᑎᑕᐅᑲᐃᓐᓇᖅᑐᓂ ᐊᒻᒪ ᐱᔭᐅᓪᓗᓂ ᑐᐊᕕᕐᓇᖅᑐᒥᑦ ᐆᒪᖅᑯᑎᓕᐅᕈᑦ ᓇᐅᔮᓂᑦ ᐊᑐᖅᑎᑕᐅᒍᓐᓃᖅᑐᓂ. QEC ᑲᔪᓯᑎᑦᑎᓯᒪᔪᑦ ᓇᓗᓇᐃᖅᓯᓪᓗᑎᒃ ᒪᓕᓐᓂᖃᓂᕐᒧᑦ ᐊᑦᑕᐃᓂᖅᓯᒪᓂᕐᒧᑦ ᐊᑐᐊᒐᖏᓐᓂ ᑎᒥᐅᑉ ᐃᓗᐊᒍᑦ ᐊᒻᒪ ᐃᒻᒥᑰᖅᑐᒥ ᓯᓚᑖᓂ ᖃᐅᔨᓴᕐᓂᐅᔪᓂᑦ, ᐊᕐᕌᒍᑕᒫᑦ ᐃᖅᑲᓇᐃᔭᕐᕕᒻᒥ ᖃᐅᔨᓴᖃᑦᑕᕐᓂᐅᔪᑦ, ᐊᑐᖅᑕᐅᒋᐊᓕᓐᓂᑦ ᐃᓕᓐᓂᐊᓂᕐᒧᑦ, ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᑲᑎᒪᖃᑦᑕᕐᓂᐅᔪᓂᑦ. ᐃᓚᒋᐊᕐᓗᒍ, QEC ᐊᖏᖅᓯᓯᒪᔪᑦ ᓄᑖᒥᑦ ᐊᑦᑕᓇᐃᖅᓯᒪᓂᕐᒧᑦ ᐊᐅᓚᑦᑎᓂᕐᒧᑦ ᐊᑐᖅᑕᐅᔪᒥᑦ, ᓇᓕᒧᓐᓂᖃᖅᑐᖅ ᖃᓄᐃᓕᓂᐅᔪᒧᑦ ᑐᓴᖅᑎᑦᑎᓂᕐᒧᑦ ᐱᕙᓪᓕᐊᓂᖓᓄᑦ ᐊᒻᒪ ᓂᐅᕕᖅᓯᒪᔪᑦ ᐃᓚᒍᑕᖏᓐᓂ ᓂᔅᓯᐅᔭᓂᑦ ᑐᐊᕕᕐᓇᖅᑐᓕᒫᓄᑦ ᐊᒻᒪ ᐊᑐᖅᑕᐅᖃᑦᑕᓕᕈᓐᓇᖅᑐᓂᑦ ᐆᒻᒪᖅᑯᑎᓕᐅᕈᑎᓂᑦ. QEC ᓴᖅᑭᑎᑦᑎᓚᐅᕐᒥᔪᑦ ᓄᐊ ᐸᓂᔪᒃ ᐃᓕᓐᓂᐊᓂᕐᒧᑦ ᑮᓇᐅᔭᖃᖅᑎᑦᑎᓂᕐᒧᑦ ᐅᕙᓂ ᒪᐃ, 2025.
QEC ᐃᖅᑲᓇᐃᔭᖃᑎᒋᑦᑎᐊᖏᓐᓇᓂᐊᖅᑕᖏᑦ ᒪᓕᑦᑕᐅᔭᕆᐊᓕᐅᖅᑏᑦ ᐊᒻᒪ ᐃᖅᑲᓇᐃᔭᖅᑏᑦ ᐊᑦᑕᓇᐃᖅᓯᒪᓂᕐᒧᑦ ᐊᑐᖃᑦᑕᖅᑕᖏᓐᓂ ᐃᑲᔪᖅᑕᐅᓗᑎᒃ ᐃᖅᑲᓇᐃᔭᖅᑎᓕᒫᑦ ᐅᑎᕐᓂᖏᓐᓄᑦ ᐊᖏᕐᕋᖏᓐᓄᑦ ᐊᑦᑕᓇᖏᑦᑐᒥᑦ ᓄᖑᖏᓐᓂ ᐅᓪᓗᑕᒫᑦ.