ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐊᑎᓕᐅᖅᑕᐅᕗᖅ ᖁᓪᓕᖅ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᓄᑦ ᐊᒻᒪᓗ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵᓄᑦ ᐋᖅᑭᒃᓱᐃᓂᐊᕐᓗᑎᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᙵᕕᖓᓂᒃ
ᐃᖃᓗᐃᑦ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖅ ᐱᒻᒪᕆᐊᓗᒻᒥᒃ ᐱᕚᓪᓕᕐᓂᖃᓚᐅᖅᑐᑦ ᐋᒡᒌᓯ 29, 2025-ᖑᑎᓪᓗᒍ, ᐊᑎᓕᐅᖅᑕᐅᓪᓗᓂ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᓇᖕᒥᓂᖁᑎᖃᖅᑎᒧᑦ, ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐ, ᐊᒻᒪᓗ ᓄᓇᕗᒻᒥ ᐆᒻᒪᖅᑯᑎᓕᐅᖅᑎᒃᑯᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ. ᑕᒪᒃᑮᒃ ᐊᑎᓕᐅᖅᓯᒪᔫᒃ ᐊᖏᕈᑎᒥᒃ ᐃᖅᑲᓇᐃᔮᖃᖅᓯᒪᔫᒃ ᑕᒪᔅᓱᒧᖓ ᐱᕚᓪᓕᖅᑕᐅᔪᒧᑦ ᐅᖓᑖᓄᑦ ᐊᕐᕌᒎᓕᖅᑐᒥᒃ, ᐊᒻᒪᓗ ᐊᐅᓚᑕᐅᓂᖓᓂᒃ, ᒫᓐᓇ ᓴᙵᑦᑎᕆᔪᑦ ᑐᙵᕕᖓᓂᒃ ᑐᑭᑖᖅᑎᑦᑎᓪᓗᑎᑦ ᓇᓗᓇᐃᔭᑦᑎᐊᖅᓯᒪᔪᑯᓗᓐᓂᒃ ᑮᓇᐅᔭᓕᐅᕐᓂᕐᒧᑦ ᐱᓕᕆᖃᑎᖐᓐᓂᖓ ᑐᑭᑖᖅᑎᑕᐅᓂᐊᓕᕐᒪᑦ ᓯᕗᓂᒃᓴᒥ ᓂᐅᕕᐊᖑᒍᓐᓇᓛᕐᓂᖓ ᐃᒥᕐᒧᑦ ᐆᒻᒪᖅᑯᑎᓕᐅᖅᑕᐅᖃᑦᑕᕐᓂᐊᓕᖅᑐᖅ.
ᖁᕕᐊᓱᑦᑐᒻᒪᕆᐅᕗᖓ ᑕᑯᓪᓗᒋᒃ ᑕᒪᒃᑮᒃ ᑲᑐᔾᔨᖃᑎᒌᖑᔫᒃ ᐊᔾᔨᒋᔭᕐᒥᓂᒃ ᐱᔪᒪᔭᖏᓐᓂᓪᓗ ᐊᖏᕈᑎᖃᖅᑐᑎᒃ ᐊᒻᒪᓗ ᐃᖅᑲᓇᐃᔭᖃᑎᒌᑦᑐᑎᒃ ᐱᐅᓯᕚᓪᓕᖁᓪᓗᒍ ᕿᑭᖅᑖᓗᒻᒥᐅᑦ ᐃᓄᒻᒪᕆᖏᑦ. ᑖᓐᓇ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖅ ᑲᓇᑕᒥ ᐋᖅᑭᒃᓱᐃᔾᔪᑕᐅᕗᖅ ᐱᓕᕆᐊᖑᓪᓗᓂ, ᖃᐅᔨᓵᖑᔪᖅ ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᒪᐃᓐᓂ ᐃᑲᔪᖅᑐᖅᑐᓂᐅᒃ. ᐱᕕᖃᕈᑎᕐᔪᐊᕌᓘᕗᖅ ᖃᐅᔨᒪᑦᑎᐊᖁᓪᓗᑕ ᐃᖃᓗᐃᑦ ᐱᕈᕐᓂᐊᕋᒥᒃ, ᐊᕙᑎᒥᒃ ᐃᓕᖅᑯᓯᕐᒥᓗ ᐃᑉᐱᒍᓱᑦᑎᐊᖅᑐᑎᒃ ᐱᓕᕆᐊᖑᕗᖅ. ᑖᓐᓇ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᑕᑯᒃᓴᐅᑎᑦᑎᕗᖅ ᐱᓕᕆᐊᑦ ᓯᕗᒧᐊᑦᑎᑕᐅᔪᓐᓇᕐᒪᑕ ᐱᓕᕆᖃᑎᖐᒃᑯᑎᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᒐᕙᒪᖏᑦ, ᓯᕗᓪᓕᐅᔾᔨᓂᖏᑎᒍᑦ ᐊᒻᒪᓗ ᐃᑉᐱᒍᓱᑦᑎᐊᕐᓗᑎᑦ ᐱᔪᓐᓇᐅᑎᖏᖕᓂᒃ ᐃᓄᒻᒪᕇᑦ,” ᐅᖃᖅᑐᓂ ᐅᓛᔪᖅ ᐊᑭᓱᒃ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ.
ᓇᓚᐅᒃᑖᖅᑕᐅᓯᒪᓪᓗᓂ 15 – 30 MW ᐊᐅᓚᓂᖃᕈᓐᓇᕐᓂᖓᓂᒃ ᐆᒻᒪᖅᑯᑎᓕᐅᕈᑕᐅᓗᓂ, ᑕᒪᓐᓇ ᐊᑐᖅᑕᐅᖃᑦᑕᖅᑐᑐᖃᕐᒥᒃ ᐃᒥᕐᒥᒃ ᐊᑐᖅᑐᓂ ᐆᒻᒪᖅᑯᑎᓕᐅᕈᑎᒋᔭᐅᔪᒪᕗᖅ ᖃᓂᒋᔭᖓᓂ ᑰᒑᓗᑉ (~60km ᐃᖃᓗᐃᑦ ᐅᐊᓐᓇᖓᓂ) ᐃᓇᖐᓇᓱᐊᖅᑐᖅ ᐅᖅᓱᐊᓗᒃᓴᒥᒃ ᐊᑐᖅᑐᑎᒃ ᐆᒻᒪᖅᑯᑎᓕᐅᓗᐊᓲᑦ ᐃᖃᓗᓐᓂᓄᑦ, ᑲᓇᑕᑉ ᐅᑭᐅᖅᑕᖅᑐᖓᓃᓛᖅ ᓄᓇᓕᐸᐅᔭᖅ ᐊᖓᔪᖅᑳᖃᕐᕕᒃ (ᐃᓄᖏᑦ ᐊᒥᓲᓂᖏᑦ: ~7,500). ᑕᒫᓂ ᐊᕐᕌᒍᒥ ᐅᖃᐅᓯᐅᓯᒪᔪᓂᒃ ᑭᒃᑯᑐᐃᓐᓇᕐᓂᒃ ᖃᓄᐃᓕᐅᕈᑎᖃᕆᐊᙵᖅᓯᒪᓪᓗᑎᑦ, ᐱᓕᕆᐊᖅ ᖃᐅᔨᓴᕐᓂᐊᕆᕗᖅ ᐱᕕᖃᕈᑎᓂᒃ ᐆᒻᒪᖅᑯᑎᓕᐅᕐᓗᑎᑦ ᐅᖅᑰᓴᐅᑎᓄᑦ ᐊᒻᒪᓗ ᓴᓇᕕᐅᔪᓄᑦ ᐊᑐᖅᑕᐅᔪᓐᓇᕐᓂᖏᓐᓂᒃ. ᒫᓐᓇᒧᑦ ᑎᑭᑦᑐᒍ, ᐱᕙᓪᓕᐊᒍᑎᖃᖅᓯᒪᔪᑦ ᕿᒥᕐᕈᓇᒃᑕᒻᒪᕆᐅᓪᓗᑎᑦ ᑕᒪᐃᓐᓂ ᓄᑖᕈᖅᑎᒐᒃᓴᑦ ᓄᓇᒦᙶᖅᑐᓂᒃ ᐆᒻᒪᖅᑯᑎᓕᐅᕈᑕᐅᔪᓐᓇᖅᑐᑦ ᓇᓖᕌᕋᒃᓴᑦ ᐃᖃᓗᓐᓄᑦ, ᓂᕈᐊᖅᑕᐅᓂᖓ ᐃᓂᒃᓴᖓᑕ ᐊᒻᒪᓗ ᖃᕋᓴᐅᔭᕐᓅᖓᓂᖏᑦ ᑭᒃᑯᑐᐃᓐᓇᕐᓄᑦ ᓂᕈᐊᖅᑕᐅᓯᒪᔪᑦ ᐱᐅᒋᔭᐅᓛᕐᒧᑦ (76% ᐊᖏᖅᓯᒪᓪᓗᑎᑦ), ᓯᕗᓂᐊᒍᑦ ᐊᐅᓚᓂᕆᔭᖏᑕ ᐋᖅᑭᒃᓱᖅᓯᒪᓂᖏᑦ ᓄᓇᓗᓱᓇᒃᑯᑖᕈᓘᔭᖏᑦ ᓴᓇᔭᐅᔭᕆᐊᖃᕈᑎᖏᑦ, ᐊᒻᒪᓗ ᓯᕗᓪᓕᖅᐹᕐᒥᒃ ᐃᓂᒃᓴᖓᓂ ᑐᑭᓯᒋᐊᕈᑎᓂᒃ ᓄᐊᑦᑎᓂᕐᒧᑦ ᐱᓕᕆᐊᑦ, ᒫᓐᓇ ᓱᓕ ᑕᒪᒃᑯᐊ ᑲᒪᒋᔭᐅᔪᑦ ᐃᖅᑲᓇᐃᔮᕆᔭᐅᓪᓗᑎᑦ.
ᕼᐃᐅᕆ ᕕᓕᐅᕆᑎ, ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵᓄᑦ ᐊᒻᒪᓗ ᕿᑭᖅᑖᓗᒃ ᑯᐊᐳᕇᓴᓐ−ᒃᑯᓐᓄᑦ ᐅᖃᐅᓯᖃᖅᑐᒥᓂᐅᕗᖅ, “ᑕᒪᓐᓇ ᑲᔪᖏᖅᓴᕈᑎᒻᒪᕆᐅᕗᖅ ᐱᕚᓪᓕᕈᑎᒋᔭᐅᓂᖓ ᐃᖅᑲᓇᐃᔭᖃᑎᒌᓐᓂᖏᒃ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐ−ᒃᑯᖏᑦ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ. ᐊᒥᓲᒻᒪᑕ ᐱᕙᓪᓕᐊᒍᑎᖃᖅᐸᓪᓕᐊᓂᕐᒧᑦ ᐊᖏᖅᑕᐅᔭᕆᐊᓖᑦ ᑖᔅᓱᒧᖓ ᐱᓕᕆᐊᕐᒧᑦ ᐃᓱᒪᒋᔭᐅᒋᐊᓚᐅᙱᓐᓂᖓᓂᒃ ᓴᓇᔭᐅᓂᒃᓴᖓ, ᕿᑭᖅᑖᓗᖕᒥᐅᑦ ᐃᓄᒻᒪᕆᖏᑦ ᓱᓕ ᐱᕕᖃᖅᑐᑦ ᐊᒥᓱᓂᒃ ᐅᖃᐅᓯᖃᕐᓗᑎᑦ ᐃᓱᒪᒋᔭᕐᒥᓂᒃ, ᐅᖃᐅᓯᖃᕐᓗᑎᑦ ᐃᓱᒫᓘᑎᒥᓂᒃ, ᐊᒻᒪᓗ ᐋᖅᑭᒃᓱᐃᖃᑕᐅᓗᑎᑦ ᐱᕙᓪᓕᐊᓂᖓᓂᒃ. ᓯᕗᓂᐊᒍᑦ ᐊᖏᕈᑎᖃᖅᓯᒪᔮᕐᓗᓂ ᓲᕐᓗᒃ ᑖᒃᑯᑑᓇᑉ ᐃᑲᔪᕐᓂᐊᖅᑐᖅ ᖃᐅᔨᒪᓇᑦᑎᐊᖁᓪᓗᒍ ᑲᔪᓯᓂᖃᑦᑎᐊᕐᓂᐊᕐᒪᑦ ᑭᖑᕙᙱᓪᓗᓂᓗ ᓱᖅᑯᐃᓇᖅᑐᑯᓗᖕᒥᒃ ᑐᑭᓯᐅᒪᓕᕈᑦᑕ ᐊᕙᑎᒧᑦ ᓱᕐᕋᒃᓴᕋᐃᑎᑦᑎᓗᐊᕋᔭᕐᓂᖓ ᑰᒑᓗᒃ, ᐊᒻᒪᓗ ᐊᖏᖅᑕᐅᓗᓂ ᐃᓄᒻᒪᕆᖕᓄᑦ. ᓯᕗᓪᓕᐅᑎᒃᑲᑦᑎ ᒪᓕᓪᓗᒋᑦ ᓄᓇᓕᒻᒥᐅᑦ ᓯᕗᒃᑲᖅᑖᕆᔭᖏᑦ ᐊᒻᒪᓗ ᐊᐅᓚᑦᑎᓗᑕ ᓴᓗᒪᔪᒥᒃ, ᓄᑖᕈᖅᑎᒐᒃᓴᒥᒃ ᐊᑐᕐᓗᓂ ᓄᓇᒦᙶᖅᑐᓂᒃ ᐆᒻᒪᖅᑯᑎᓕᐅᕐᓗᓂ ᐊᐅᓚᓂᖃᑦᑎᐊᕈᓐᓇᕐᓂᓕᒫᕐᒥᒃ ᐊᑐᕐᓗᑕ, ᐊᒻᒪᓗ ᐃᓱᓕᑦᑎᓪᓗᒍ ᑕᑎᖃᓗᐊᕐᓂᕗᑦ ᐅᖅᓱᐊᓗᒻᒥᒃ ᐆᒻᒪᖅᑯᑎᓕᐅᕐᓂᖅ, ᖃᐅᔨᒪᓪᓗᑕ ᐊᒥᓱᓂᒃ ᐋᓐᓂᖅᓯᔪᓐᓇᓲᖅ ᓄᓇᑦᑎᓐᓂ, ᐊᓂᕐᓂᒥᒃ, ᐊᒻᒪᓗ ᐃᒪᕐᒥᒃ.”
ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵ, ᑕᒪᐃᓐᓂ ᓇᖕᒥᓂᖁᑎᒋᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᙵᓄᑦ (ᐃᓄᐃᑦ ᐱᕙᓪᓕᐊᓂᕐᒧᑦ ᑯᐊᐳᕇᓴᓐ−ᖁᑎᖓ ᑕᐃᑲᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖓᓂᒃ), ᐋᖅᑭᒃᑕᐅᓚᐅᖅᓯᒪᕗᖅ ᐱᔪᒪᓂᖏᑦ ᐱᕈᖃᕐᓂᖏᓪᓗ ᒪᓕᑦᑐᒋᑦ ᐋᖅᑭᒃᓱᐃᖁᔭᐅᓪᓗᑕ ᓄᑖᕈᖅᑎᒐᒃᓴᓂᑦ ᓄᓇᒦᙶᖅᑐᓂᒃ ᐊᑐᕐᓗᑕ ᐆᒻᒪᖅᑯᑎᓕᐅᕈᓐᓇᕐᓂᐊᕋᑦᑕ ᐱᓕᕆᖃᑎᒋᔭᐅᓗᑎᑦ ᓄᓇᓖᑦ ᕿᑭᖅᑖᓗᓕᒫᕐᒥ. 100% ᐃᓄᒻᒪᕆᖕᓄᑦ ᓇᖕᒥᓂᖁᑎᒋᔭᐅᓪᓗᓂ ᑲᒻᐸᓂᐅᔪᖅ ᓯᕗᒃᑲᖅᑕᖅᑎᐅᕗᖅ ᐃᓄᒻᒪᕇᑦ−ᓇᖕᒥᓂᖁᑎᖓᓂᒃ ᐊᖏᔪᒥᒃ ᓴᓗᒪᔪᒥᒃ ᐱᖁᑎᕐᔪᐊᖃᕐᓂᐊᕋᒥᒃ, ᓯᕗᓪᓕᐅᔾᔨᖃᑦᑕᖅᑐᒥᒃ ᐊᕙᑎᒥᒃ, ᓂᕐᔪᑎᓂᑦ, ᐃᓄᐃᑦ ᐃᓕᖅᑯᓯᑦᑎᐊᕚᓗᖏᖕᓂᒃ ᐊᒻᒪᓗ ᖃᐅᔨᒪᓂᖏᖕᓂᒃ, ᐊᒻᒪᓗ ᐊᑭᖃᙱᑦᑐᒥᒃ, ᓯᕗᐊᒍᑦ, ᑐᑭᓯᐅᒪᑎᑕᐅᓗᑎᑦ ᐊᖏᖅᓯᒪᑦᑎᐊᖅᑐᓂᒃ.
ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐅᖃᖅᓯᒪᔪᖅ ᐃᒪᓐᓇ, ᑖᓐᓇ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖅ ᓴᓇᔭᐅᓗᓂ, ᐆᒻᒪᖅᑯᑎ ᓂᐅᕕᐊᕆᔭᐅᓂᖓᓄᑦ ᐊᖏᕈᑎᓕᐅᕐᓗᑎᑦ (PPA) ᓇᖕᒥᓂᖁᑎᖃᖅᑐᖅ ᑎᒥᐅᔪᖅ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ ᑮᓇᐅᔭᓕᐅᕐᓂᕐᒧᑦ ᑎᑎᖅᑲᕆᔭᐅᓪᓗᐊᑕᕐᓂᐊᖅᑐᖅ, ᐅᖃᖅᓯᒪᓗᓂ ᓂᐅᕕᐊᖑᓂᖏᑦ ᐊᒻᒪᓗ ᐊᑭᖏᑦ ᑕᒪᒃᑮᒃ ᐃᒥᕐᒧᑦ ᐆᒻᒪᖅᑯᑎᓕᐅᕈᑕᐅᓯᒪᔪᖅ, ᐊᒻᒪᓗ ᐃᑲᔪᖅᑐᖅᑕᐅᓂᖓᓄᑦ ᐱᔨᑦᑎᕋᕈᑎᖏᑦ. ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᓐ ᐊᒻᒪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ, ᑭᓯᐊᓂᓕ, ᓇᓗᓇᐃᔭᖅᓯᒪᔪᖅ ᐊᖏᖃᑎᒌᑦᑑᒃ ᐊᖏᖅᓯᒪᓂᖏᑦᑕ ᐱᓇᓱᐊᒐᕐᓂᒃ ᐊᒻᒪᓗ ᐱᔾᔪᑎᖃᕋᓱᐊᕈᑎᖏᑦ ᑕᒫᓂ. ᑎᑭᑕᐅᓇᓱᐊᖅᑐᖅ ᐋᖅᑭᒃᑕᐅᓗᓂ ᐊᖏᕈᑎᒋᔭᐅᔭᕆᐊᓖᑦ ᐊᖏᕈᑎᒋᔭᐅᓗᑎᑦ ᐋᔩᕋᕈᑕᐅᒐᔭᖅᑐᑦ ᐊᑎᓕᐅᖅᑑᓐᓄᒃ, ᑕᒪᐃᓐᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᙵᕕᓕᐅᕋᔭᖅᑐᑎᒃ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖓᓄᑦ.
“ᑖᓐᓇ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᓇᓗᓇᐃᒃᑯᑕᐅᕗᖅ ᐱᕙᓪᓕᐊᔪᒻᒪᕆᐅᓯᒪᓂᑦᑎᓐᓂᒃ ᑲᑐᑎᔭᑦᑎᓐᓂᒃ ᐊᑐᖅᑕᑦᑕ ᓴᓗᒪᔪᒥᒃ ᐆᒻᒪᖅᑯᑎᖃᓛᖁᓪᓗᒍ ᓯᕗᓂᒃᓴᒥ ᓄᓇᕗᒻᒥ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ ᐅᐱᒍᓱᑦᑐᑦ ᐱᓕᕆᖃᑎᖃᕆᐊᒃᓴᖅ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵᓂᒃ ᖃᐅᔨᓴᕐᓗᑎᑦ ᑕᑎᒋᔭᒃᓴᒥᒃ, ᓄᓇᒦᙶᖅᑐᒥᒃ ᓄᑖᕈᖅᑎᒐᒃᓴᒥᒃ ᐊᓯᐊᒍᖔᖅ ᐊᑐᖔᕐᓗᑎᑦ ᐅᖅᓱᐊᓗᒻᒥᒃ ᐆᒻᒪᖅᑯᑎᐅᙱᑦᑐᒥᒃ ᐃᖃᓗᓐᓄᑦ. ᐃᖅᑲᓇᐃᔭᖃᑎᖏᔭᐅᓪᓗᑎᑦ ᐃᓄᐃᑦ ᑲᑐᔾᔨᖃᑎᖐᖏᑦ ᐊᒻᒪᓗ ᐃᑉᐱᒋᔭᐅᑦᑎᐊᕐᓗᑎᑦ ᓄᓇᓕᖓ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖃᕐᕕᐅᔪᒥᒃ ᑕᒪᐃᓐᓂᓕᒫᖅ ᐱᕙᓪᓕᐊᑎᓪᓗᒋᑦ, ᐃᑲᔪᖅᑐᒍᑦ ᑐᙵᕕᓕᐅᖃᑕᐅᓗᑕ ᐆᒻᒪᖅᑯᑎᓕᐅᕐᓂᕐᒧᑦ ᐋᖅᑭᒍᑎᒃᓴᓂᒃ ᐊᔾᔨᖃᖅᑐᑦ ᐱᒻᒪᕆᒋᔭᖏᑦ ᐊᒻᒪᓗ ᐊᑐᕈᒪᓛᖅᑕᖏᑦ ᓄᓇᕗᒻᒥᐅᑕᐅᔪᑦ,” ᐅᖃᖅᑐᓂᐆᓂᔅᑦ ᑕᒡᓚᔅ, ᐊᖓᔪᖅᑳᖅ ᐊᒻᒪᓗ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵᓄᑦ.
ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐅᖃᖅᓯᒪᒋᕗᖅ “ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵ ᐃᓕᓴᖅᓯᒐᒥᒃ ᐱᒻᒪᕆᐅᓂᖓᓂᒃ ᐊᓯᔾᔨᖅᐸᓪᓕᐊᔪᒨᕐᓗᑎᑦ ᓴᓗᒪᔪᒥᒃ ᐆᒻᒪᖅᑯᑎᓕᐅᓂᕐᕐᒥᒃ ᐊᒻᒪᓗ ᐱᓕᕆᖃᑎᖃᕐᓂᐊᕐᓂᕋᖅᓯᒪᓪᓗᑎᑦ ᓄᓇᕗᑦ ᓄᒃᑭᒃᓴᐅᑏᑦ ᑯᐊᐳᕇᓴᙵᓂᒃ ᐱᕙᓪᓕᐊᒍᑕᐅᓂᖓᓂᒃ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᕐᒥᒃ ᐊᑐᓕᖅᑎᑦᑎᕙᓪᓕᐊᓂᖃᖅᑐᖅ ᐅᖃᐅᓯᒥᓂᖏᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᔪᑦ ᐊᒻᒪᓗ ᐱᐅᓛᒃᑰᕐᓗᑎᑦ ᒪᓕᓪᓗᑎᑦ ᐱᔪᒪᔭᖏᑦ ᐆᒻᒪᖅᑯᑎᓂᒃ ᐊᑐᓲᕐᓂᒃ, ᓄᓇᓕᑉ, ᐊᕙᑎ ᑕᒪᐃᓐᓂ, ᐊᒻᒪᓗ ᑰᒑᓗᑉ.
ᒥᓂᔅᑕ ᐋᕐᓗᒃ ᒪᐃᓐ, ᒥᓂᔅᑕ ᑲᒪᒋᔭᖃᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵᓄᑦ, ᐅᖃᖅᑐᒥᓂᐅᕗᖅ, “ᐊᑎᓕᐅᖅᑕᐅᓂᖓ ᑖᓐᓇ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐆᑦᑑᑎᑦᑎᐊᕙᐅᕗᖅ ᐊᑑᑎᖃᓪᓚᑦᑖᕐᓂᐊᖅᖢᓂ ᖃᓄᖅ ᓄᓇᕗᑦ ᒐᕙᒪᖏᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᑦᑐᓐᓇᕐᒪᑕ ᓯᕗᒧᐊᒃᑎᑦᑎᓗᑎᑦ ᐱᖁᑎᕐᔪᐊᑦ ᐱᓕᕆᐊᕆᔭᐅᓂᖏᖕᓂᒃ ᐃᑲᔫᑕᐅᔪᑦ ᐃᓄᐃᑦ ᐊᒻᒪᓗ ᐊᕙᑎ. ᒥᓂᔅᑕᐅᓪᓗᖓ ᑲᒪᒋᔭᖃᕐᓗᖓ ᖁᓪᓕᖅ ᐋᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᙵᓄᑦ, ᑕᒪᐃᓐᓂᑦᓯᐊᖅ ᐃᑲᔪᖅᑐᖅᐸᕋ ᑖᑉᑯᐊ ᐱᓕᕆᖃᑎᒌᖏᓐᓇᕐᓂᖏᑦ ᐊᒻᒪᓗ ᐃᖃᓗᐃᑦ ᓄᒃᑭᒃᓴᐅᑏᑦ ᐱᓕᕆᐊᖅ ᐱᔪᓐᓇᕐᓂᖓ ᐃᑲᔪᕐᓗᑎᒃ ᐆᒻᒪᖅᑯᑎᖃᑦᑎᐊᖏᓐᓇᖅᑎᑦᑎᓂᐊᕐᒪᑦ, ᑮᓇᐅᔭᓕᐅᕈᑕᐅᓗᓂ, ᐊᒻᒪᓗ ᐊᕙᑎᒥᒃ ᓇᐅᑦᓯᖅᑑᑕᐅᑦᓯᐊᕈᑕᐅᓗᓂ ᓄᓇᕗᒻᒥ.”
ᑭᖑᓪᓕᖅ ᖃᓄᐃᓕᐅᕈᑎᒋᔭᐅᓂᐊᓕᕐᒥᔪᖅ ᑕᒫᓂ ᐊᐅᓚᓂᖓᓂᒃ ᐋᖅᑭᒃᓱᐃᓗᑎᑦ “ᑕᐃᒎᓯᓪᓗᐊᑕᕐᓂᒃ” ᑎᑎᖅᑲᒥᒃ, ᐱᖃᓯᐅᔾᔨᒐᔭᖅᑐᑦ ᐱᒻᒪᕆᐅᔪᑦ ᑕᐃᒎᓯᖏᑦ ᑕᒪᐃᓐᓂ ᐊᖏᕈᑎᓂᒃ ᑐᑭᖃᕈᑎᒋᔭᐅᔪᑦ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎᖓᓂᒃ, ᐊᐅᓚᐅᑎᓄᑦ ᐊᒻᒪᓗ ᐊᐅᓪᓛᕈᑎᖏᑦᑕ ᐃᖃᓗᓐᓂ ᐃᒥᕐᒧᑦ ᐆᒻᒪᖅᑯᑎᓕᐅᕐᓂᖅ ᐱᓕᕆᐊᖅ. ᑐᑭᓯᐅᒪᖃᑎᒌᖕᓂᕐᒧᑦ ᐊᖏᕈᑎ ᐊᑐᖅᑕᐅᓯᒋᐊᓛᖅᑐᖅ ᓯᑏᕝᕙ 30, 2026−ᕈᕋᓱᐊᕐᓂᖓᓂᒃ, ᑕᐃᑲᓂ ᓄᑖᕈᖅᑎᑕᐅᒋᐊᕋᔭᖅᑐᓂ, ᐊᒻᒪᓗ ᐊᑐᓕᖅᑎᑦᑎᔭᕆᐊᖃᕋᔭᖅᑐᒃᓴᐅᓪᓗᓂ ᐱᕙᓪᓕᐊᒍᑎᖏᔭᐅᓯᒪᓂᖏᑦ ᐊᕐᕌᒎᓯᒪᔪᒥᒃ ᐊᕐᕌᒍᒧᑦ.