IQALUIT, NU – June, 16, 2026 – Qulliq Alruyaktuqtunik Ikumatjutiit (QEC) apiqhuqtauhimayut Nunavunmi Apiqhuiyiinit uplumi ihuinaarutainut QEC-kunnut ataagut Amirnaiyautinut Maligait ihumagiplugu huiqtuqaqhimayuq Nauyaanit July 5-mi, 2024, huirutaanit QEC-kut alruyaliqiyiat.
QEC-kut ihuinaaqturihimayut atauhiqmit piyauyurihimayaannit ataagut ilanga 4(1)(b) talvanngat Amirnaiyautinut Maligait – taimaa talvani upluani hanianiluuniit July 5, 2024, QEC-kut havakviktut amirnaiqhimaittaamik “ihariagiyaqnik amirihimainnamik aniguqtihimaittugulu aulapkaihimaittugillu tamangnik ihuaqutighat havauhiit taimaa aanniaqtailiniit aanniqtailiniillu tamangnik inuit, taamnalu Noah Paniyuk… hivuani havaktillugulu Noah Paniyuk qaanganit iluaniluuniit Irininautit Huanngautit Havakvianit Nauyaanit Qulliliqivianit.”
Tamangnik 8-nguyut apiqhuiyikkuuqvighait amuyauhimayut tughirautaigut Apiqhuiyiryuanit.
QEC-kut Apiqhuiyiryuallu takupkaihimayut ikayuqtigiighutik titiraqnik taniqtuutighainik Apiqhuiyinut. QEC-kut angiqhimayut akiliqtuiyaamik akighanik taimaa $240,000 taalamik akiliqtauluni Havaktiit Amirnaiyautinut Manighautainut, taimaalu 15%-mik avvaanik huiqhimayuq akighautainik.
“Malrunnguqpalliayut ukiut atuqhimayut tammaiviptingnit havaqatimik pilgaqhuutiqpianut taimaalu upluq qaangiyuittuq itqaumagihimaittugu Mr. Paniyuk. Ihumagivaktaqqut ilaita huli, nunallaangat tamangniklu ilihimayaat,” uqaqtuq Ernest Douglas, Angayuqqaaq CEO-nguyuqlu QEC-kunnit. “Apiqhuiyikkuurniq utiqtittilaittuq tammaihimayaptingnik. Naammagivaqqut Apiqhuiyit ihumaliugait, nanngarivaqqullu Mr. Paniyuk itqaumagiplugu havaaptikkut, upluq tamaat, taimaa amirnaiqhimayaamik qitqanit hulivaktaptingnik QEC-kunnit.”
Kinguani huiqviat, QEC-kut havakviit iluani ihivriuqhihimayut tuhaqtittiplugit ilihimaliqtait taapkununnga Havaktut Qayagitjuttikhainnik uvalu Ikayukhiakuttikhianit Katimayiit (WSCC). QEC-kut havaqatigittiaqhimayait WSCC-kut ihivriuqhiyiit.
Angiqtauhimayut titiqqat hulihimayunit naunaiyautauyuq taimaa QEC-kut amirnaiyautinik ilihautiniklu hailihimavagait talvuuna huiqtuqaqtumit. QEC-kut ilitarihimayut, kihimi, amirnaiyautinut maligaghait, havauhiit ilihautillu atuqtauhimayughat, aghuuqtaulutik atuqtaulutiklu upluq tamaat.
Kinguani huiqtuqaqviat, QEC-kut atuqtittihimayut havakvingnit-tamaat amirnaiyautinut nutqaqtiriplutik taimaalu irininaqtunut huanngautik amuyauhimapluni Nauyaanit. QEC-kut malittiaqhimanahuaqpaktait amirnaiyautinut maligaghait taimaa havakviit iluani ilikkuuqtuniklu ihivriuqhiplutik, ukiuq tamaat havakvingnik ihivriuqhiplutik, pitquyauhimayutut ilihautinik, qakugunnguraangallu katimatjutivaghugu. Ahiagullu, QEC-kut aniguqtittihimayut nutaanik amirnaiyautinik munaqtiuyut havauhiinik, ayuqnaiqpaalliqhugu huliyuqaqtunik naunaiyaiyut havauhiinik niuviqhimaplutiklu ahiagut annautighat nighingnik tamangnut irininaqtunut nutaatqiyanullu huanngautinik. QEC-kut aullaqtihimaliqtullu taaffuminnga Noah Paniyuk Ilihaqpaalliutighat May, 2025-mi.
QEC-kut havaqatigihimmaarahuaqtait maligaliuqtit havaktiillu amirnaiyautainut havauhiqnik ikayurahuaqhugit tamangnik havaktiit havaguiqhimagaangat aimavingnuttiariamik upluq tamaat.